Íslandsmót Fjallakofans og HFR í fjallabruni

Íslandsmót Fjallakofans og HFR í fjallabruni verður haldið í Úlfarsfelli sunnudaginn 25. ágúst.

Keppt verður í örlítið breyttri braut frá því í fyrra. Keppendum ber að skoða brautina vel fyrir mót.

Ræsing er klukkan 12:00. 

Afhending keppnisgagna fer fram á bílastæðinu við botn brautar milli klukkan 10:30 og 11:30. Brautin er opin til æfinga þangað til 11:30.

Keppendur undirr 18 ára eru alfarið á ábyrgð foreldra/forráðamanna. Gögn verða ekki afhent keppanda yngri en 18 ára nema ábyrgðaraðili sé til staðar.

Ráslisti verður unnin eftir árangri úr fyrri mótum og verður birtur hér á vefnum á keppnisdag. Keppendur fá úthlutað rásnúmer í samræmi við ráslista.

Hjólaðar eru tvær umferðir og gildir betri tíminn. Keppendum er frjálst að sleppa seinni umferðinni kjósi þeir að gera það.

Keppt er eftir Keppnisreglum HRÍ

Sérstaklega skal skoða kafla 5.3 um Fjallabrun.

Búnaður:

Samkvæmt keppnisreglum HRÍ skal nota hjálm sem ver allt andlit (full-face) bæði í keppni og við æfingar. Hjálmurinn verður að vera með skyggni. Opnir hjálmar án kjálkahlífar eru bannaðir. Einnig skal vera með augnhlífar (gogglur eða hlífðargleraugu). Sérstaklega er mælt með eftirfarandi aukahlífðarbúnaði:

A. Bak-, Olnboga-, hné- og axlahlífum úr stífum efnum.

B. Vörn fyrir háls og hryggjarliði.

C. Vörn fyrir sköflunga og læri.

D. Víðum buxum úr rifvörðu efni með innbyggðum hlífum fyrir hné og kálfa, eða stuttbuxum úr rifvörðu efni ásamt hné og kálfahlífum.

E. Síðerma treyju.

F. Hönskum.

Þessi braut er sú tæknilegasta í mótaröðinni og því biðjum við keppendur að skoða hana vel áður en keppt er.

Athugið að búið er að loka veginum að brautinni. Bílastæði eru við Skógræktina, Bauhaus og gönguleiðina fyrir innan nýja hverfið í Úlfarsársdalnum. 

Fjallakofinn gefur úrdráttarverðlaun og verða á staðnum með vörur úr búðinni til sölu.