Jökulmílan

Upplýsingar

Njóttu hringferðar um ævintýralendur Snæfellsness. Allir velkomnir í Grundarfjörð, þar sem Mílan hefst og endar

Keppnislengd

Rangsælis hringur um Snæfellsnes sem hefst í Grundarfirði. Hjólað er vestur fyrir Jökul, til baka um Vegamót og Vatnaleið. Drykkjarstöðvar verða þrjár: við Lambhagatjarnir (eftir 49 km), við Búðir (eftir 87 km) og á Vegamótum (eftir 124 km). Ræsing fyrir náttúruunnendur kl. 9:00; keppnisflokk karla og kvenna kl. 11:00 og þátttakendur á tímatöku- og þríþrautarhjólum kl. 11:10.

Æfingar og brautarskoðanir

Það er mikilvægt að manni líði vel í löngum hjólreiðatúrum. Við mælum því með að undirbúningur fyrir þátttöku í Jökulmílunni sé vel skipulagður. Hafir þú ekki þegar æfingaáætlun eða þjálfara, þá getur þú prófað að leita að "century ride training plan" eða einhverju álíka á veraldarvefnum og séð hvað þú finnur.

Margir hjólreiðaklúbbar innan vébanda Hjólreiðanefndarinnar bjóða einnig uppá skipulagða þjálfunaráætlun. Sértu ekki í klúbbi, þá hvetjum við þig að kíkja við á vefsvæðum þeirra (sjá hlekki hér neðst á síðu) og setjir þig í samband hafir þú áhuga á slíkri leiðsögn.

Reglur

Fjölskylduverð: 10.000 kr.- Reglur í Jökulmílunni:

1. Hjálmaskylda er í Jökulmílunni.
2. Þátttakendum er óheimilt að þiggja utanaðkomandi aðstoð í viðburðinum. Undantekningar eru: drykkir, matur, fatnaður, slöngur, dekk og verkfæri. Einnig má skipta um reiðhjól og gjarðir.
3. Heimilt er að nýta sér skjól af öðrum hjólum, en þríþrautarhjól og götuhjól meiga ekki blandast í hóp. Í hópi þríþrautarhjóla sem vinna saman er óheimilt að liggja á liggistýri nema þegar viðkomandi hjól er fremst í hópi. Um leið og þríþrautarhjól nýtur skjóls af öðru hjóli skal hjólamaður staðsetja hendur við bremsur.
4. Bannað er að stytta sér leið. Yfirgefi þátttakandi auglýsta leið verður hann að koma inn á hana á sama stað og hann yfirgaf hana.
5. Þátttakandi má ekki með hegðun sinni stofna öðrum þátttakendum eða vegfarendum í hættu. Þátttakendur skulu ávallt sýna af sér íþróttamannslega hegðun.
6. Reiðhjólið skal vera búið góðum bremsum framan og aftan og öll öryggisatriði í lagi. Stýrisendar verða að vera lokaðir.
7. Þátttakandi mælist kominn í mark þegar fremsti punktur framdekks snertir lóðlínu yfir fremri brún marklínu.
8. Þar sem Jökulmílan er haldin á vegum sem opnir eru fyrir almennri umferð skulu þátttakendur fylgja almennum umferðalögum í hvívetna.
9. Þau lög og reglur sem Hjólreiðanefnd ÍSÍ hefur sett um hjólreiðakeppnir á Íslandi gilda eftir því sem við á í Jökulmílunni.
10. Allir þátttakendur skulu hafa með sér farsíma og gefa stjórn Jökulmílunnar upp símanúmer sitt. Þeir skulu strax tilkynna stjórn símleiðis ef þeir kjósa að hætta í viðburðinum.
11. Endamarki í Grundarfirði er lokað kl. 21:00.

Skilmálar

Þátttaka í Jökulmílunni er alfarið á ábyrgð þátttakandans sjálfs. Með því að skrá sig í Jökulmíluna afsalar hann sér öllum kröfurétti á hendur Hjólamanna sem mótshaldara. Þátttakandi hefur kynnt sér reglur Jökulmílunnar.