Heimsmeistaramótið í Enduro hjólreiðum fór fram dagana 16. til 18. október s.l. Í Finale Ligure á Ítalíu. Héðan frá Íslandi fóru þrír keppendur ásamt fararstjóra og myndatökumanni til að halda uppi heiðri okkar þjóðar.

Í ár var keppnisleiðin löng og krefjandi og reyndi á úthald og reynslu keppenda til að halda orkunni uppi yfir daginn. Leiðin var rúmlega 60 km. með 1800 m. klifri og 2800 m. lækkun, inní því voru sex sérleiðir sem voru mislangar frá 1 km. upp í tæpa 7 km.

Föstudagurinn 16. október var skipulagður æfingadagur keppninnar en þá verða keppendur að hjóla allar ferjuleiðir og sérleiðir keppninnar alveg eins og á keppnisdag. Þar reyndi vel á strákana og sérstaklega nýliðann í hópnum, Grétar, sem var að takast á við sinn stærsta hjóladag. En eftir daginn voru strákarnir með góða hugmynd um hvað þyrfti til að tækla keppnis daginn sjálfan.

Það var kærkomið að fá hvíld á laugardeginum og var hann vel nýttur í að sinna hjólum og mönnum.

Sunnudagurinn var svo keppnisdagurinn og áttu strákarnir rástíma frá miðbæ Finale Ligure rétt eftir kl.9:00, Grétar fór fyrstur af stað með rásnúmer 55 svo stuttu þar á eftir var Jónas númer 49 og svo Þórir númer 43. Strákarnir voru það nálægt hvor öðrum í rásröðinni að á ferjuleiðum gátu þeir oftast hjólað saman og gátu þannig peppað hvern annan fyrir hverja sérleið. Mikið var um áhorfendur og sérstaklega á síðustu sérleið dagsins sem er ein þekktasta enduro keppnisleið heims, DH Men. Þar var fólk meðfram stærstum hluta brautarinnar að hvetja og var stemmingin ólýsanleg að klára keppnina niður þá leið. Að lokum komust strákarnir inn til Finale Ligure eftir um 8 klst. dag á hjólinu, og allir komu heilir og sáttir með að hafa gefið allt sitt.

107 keppendur náðu að klára keppni af 113 skráðum í Elite flokki karla og þar endaði Þórir í 97 sæti, Jónas í sæti 102 og Grétar svo sæti 103. Umtalið um keppnina var strax að þetta væri með erfiðari keppnisdögum sem keppendur höfðu upplifað og því gríðarlega gott að sjá strákana klára keppnina með stæl og greinilegt að íslenskt enduro er að gera það gott.
 

Fulltrúar okkar í ár voru:
Þórir Bjarni Traustason
Grétar Guðmundsson
Jónas Stefánsson

Fararstjóri:
Börkur Smári Kristinsson

Myndatökumaður:
Hróbjartur Sigurðsson

Úrslit má sjá hér:
https://www.uci.org/competition-details/2026/MTB/77177