Síðasta keppnin í hópstarti á EM fór fram í gær, en þá kepptu elite karlar. Voru 115 keppendur mættir til leiks og þar áttum við einn fulltrúa Íslands í hópnum, Kristinn Jónsson. Keppnisbrautin var sú sama og í elite kvenna keppninni, en í stað tveggja hringja í lokin voru farnir fimm, og heildarvegalengdin því 197 km. 

Kristinn opnaði daginn vel með því að gera fyrstu árás úr hópnum fljótlega eftir ræsingu, en hraðinn var mikill og eftir smá stund voru gerðar fleiri árásir og loks komst 6 manna hópur í burtu. Eftir fyrstu 90 km. kom Kristinn inn á hringinn ásamt öllum öðrum fyrir aftan fyrstu menn. Þar keyrði Kristinn fyrsta hring eins vel og hann gat, en missti af hópnum í klifrinu og varð að hætta keppni í lok hringsins.

Allir okkar keppendur hafa staðið sig ótrúlega vel en fyrir litla þjóð eins og Ísland skiptir máli að mæta og láta sjá sig, gera sitt allra besta þrátt fyrir erfiðar aðstæður og læra af reynslunni. Það má segja að þessum hópi hafi tekist það glimrandi vel.

Mótið er þó ekki búið enn, nú fáum við tvo æfingadaga til undirbúnings fyrir tímatökukeppnina sem fer fram á miðvikudaginn. Þar verður farinn einn 22 km. hringur, sá sami og hefur verið notaður í hópstartið.