Þorsteinn Bárðarson hjólreiðamaður innan vébanda Hjólreiðasambands Íslands (HRÍ) hefur verið úrskurðaður í bráðabirgðabann frá æfingum og keppni í íþróttum, samkvæmt lyfjareglum Lyfjaeftirlits Íslands

Er þetta gert eftir að lyfjapróf sem hann undirgekkst eftir keppni þann 21. ágúst síðastliðinn skilaði afbrigðilegri niðurstöðu (e. Adverse Analytical Finding).

HRÍ leggur ríka áherslu á heiðarleika og heilindi í íþróttum og mun fylgja málinu eftir í samræmi við reglur og viðeigandi ferla. Minnt er á að aðgát skal höfð í nærveru sálar og þess er vænst að fjölmiðlar og almenningur virði friðhelgi viðkomandi einstaklings á meðan málið er til skoðunar. Frekari upplýsingar um málið verða veittar að því loknu.