Ágústa Edda Björnsdóttir og Bríet Kristý Gunnarsdóttir kepptu í dag í tímatökuhjólreiðum á HM. Ágústa lauk keppni á tímanum 40:59 mínútum í 37. sæti. Meðalhraðinn var 44,36 km/klst. og er þetta bæting frá HM á Imola fyrir ári. Þannig er þetta besti árangur íslendings á heimsmestaramóti í tímatökuhjólreiðum.

Bríet Kristý Gunnarsdóttir tók þátt í sinni fyrstu heimsmeistarakeppni og lauk keppni á tímanum 43:12 mínútum og endaði með því í 44. sæti.

Alls kláruðu 49 konur keppnina í dag en í þessari grein keppa einungis þeir sem sérhæfa sig í greininni. Allt í allt voru úrslit dagsins jákvæð skref fram á við fyrir hjólreiðar á Íslandi og sýnir að við eigum erindi á þessi stórmót.

Næstu helgi keppir íslenski landsliðshópurinn í götuhjólakeppninni (RR - Road Race) en þá fá keppendur að brýna sig í u.þ.b. 160 km langri braut á klassísku svæði hér í Flanders héraði í heimalandi hjólreiða - Belgíu.

Bein útsending er frá allar keppnir mótsins á Eurosport, en einnig má sjá beint streymi á YouTube rás alþjóða hjólreiðasambandsins - UCI: https://www.youtube.com/user/ucichannel/

Hópstart (RR) - 24. september, kl. 11:25
Kristinn Jónsson, KK-U23 (Hjólreiðafélag Reykjavíkur)

Hópstart (RR) - 25. september, kl. 10:20
Ágústa Edda Björnsdóttir, KVK-Elite (Tindur)
Bríet Kristý Gunnarsdóttir, KVK-Elite (Tindur)
Elín Björg Björnsdóttir, KVK-Elite (Tindur)