Um helgina voru hæfileikabúðir haldnar inn í Tungudal á Ísafirði með góðri aðstoð heimamanna í Hjólreiðadeild Vestra. Dvalið var í Skíðaskálanum líkt og gert var á sama tíma í fyrra.

Búðirnar eru hugsaðar fyrir efnilegast fjallahjólafólkið okkar í flokkum U17, U19 og U23.  Í þessum búðum var eingöngu horft til þeirra sem stunda fjallahjólreiðar. Voru æfingar undir handleiðslu Conor Campbell landsliðsþjálfara og honum innan handar voru þeir Þorgils Óttarr Erlingsson og Viðar Kristinsson þjálfarar Hjólreiðadeildar Vestra.

Hæfileikabúðirnar heppnuðust mjög vel, veðrið var nokkurn veginn til friðar í þetta skiptið og krakkarnir lærðu mikið af Conor á þessum þrem dögum. Á laugardagskvöldið, eftir tvær langar æfingar, var kíkt í Fjörugusuna í gufubað og díft sér í sjóinn. Virkilega skemmtilegt og góð leið við endurheimtina.

Hjólreiðasambandið þakkar Vestra innilega fyrir að taka alltaf svona vel á móti okkur og fyrir aðstoðina um helgina. Einnig þá fá þeir foreldrar sem voru á staðnum og hjálpuðu til svo að allt gengi vel.