Þingvallakeppnin í ár verður með svipuðu móti og í fyrra, en samt verða nokkrar breytingar sem eru til bóta fyrir öryggi keppenda.

Ræsing hefst kl. 8:30 með A-flokki karla (Meistaraflokkur), þeir hjóla 4 hringi. 2 mínútum síðar er A-flokkur kvenna (Meistaraflokkur) ræstur út, en sá flokkur hjólar 3 hringi. 2 mínútum á eftir þeim er allur B-flokkurinn ræstur út. B-flokkur karla hjólar 3 hringi, en aðrir í B-flokki hjóla 2 hringi. Þessir þrír ráshópar: A-flokkur karla, A-flokkur kvenna og B-flokkarnir mega ekki blandast á brautinni þannig að keppendur í ólíkum flokkum séu að "drafta" hvorir annan. Allir í B-flokki mega "drafta" hvort annað að vild, óháð kyni og aldursflokki.

Það er okkur gleðiefni að tilkynna að við fáum einstefnuna eins og í fyrra frá Arnarfelli að Silfru.

Til að auka öryggi og minnka umferðaröngþveiti í endaspretti hjá keppendum höfum við jafnframt ákveðið að færa rás- og endamark niður á þann vegkafla þar sem einstefnan er ennþá í gildi (sjá mynd). Það verður við fyrsta bílastæði áður en komið er að kröppu beyjunni hjá Silfru. Þjóðgarðsvörður hefur bent okkur á að nota rúmgott bílastæði við Valhöll (þar sem hótelið stóð). Þar er reyndar engin salernisaðstaða, en keppendum er bent á aðstöðuna við tjaldsvæðin nálægt Þjónustumiðstöðinni.

Vegna þess hve lítið pláss við höfum til að athafna okkur við rás- og endamark, eru keppendur vinsamlegast beðnir um að dvelja þar ekki eftir að komið er í mark, heldur renna beinustu leið á bílastæðið við Valhöll þar sem verðlaunaafhendingin mun fara fram.