Í dag á EM í Drenthe fór fram götuhjólakeppnin í Elite flokki kvenna. Þær Kristín Edda Sveinsdóttir (HFR) og Hafdís Sigurðardóttir (HFA) voru mættar til Meppel þaðan sem þær lögðu af stað sem leið lá til Col du Vam, samtals 129,6 km. leið (59,3 km. + 5x 13,7 km. hringir í Col du Vam).

Eftir u.þ.b. 20 km. misstu þær af stóra hópnum. En sameiginlega og með samvinnu 5 annarra keppenda ásamt því að nýta sér skjól af bílalestinni tókst þeim að ná aftur inn í hópinn. Eftir um 55 km. lenti Hafdís í lítilsháttar árekstri en hún náði aftur að koma sér í hópinn. Þar héldu þær sér alla leiðinna til Col du Vam. Báðar kláruðu þær um 2 hringi áður en þeim var flaggað úr braut. Hjóluðu þær því um samtals 85 til 90 km. í dag. 

Hafdís sagðist vera heilt yfir nokkuð sátt með dagsverkið þó auðvitað hafi henni langað að komast aðeins lengra. Kristín Edda sagði upplifunina hafa verið "geggjaða" og að hún væri "ógeðslega sátt" þar sem hennar markmið hafi verið að komast inn á hringina í Col du Vam.

Úrslit dagsins má sjá á www.uec.ch

Á morgun er lokadagur Evrópumótsins í götuhjólreiðum. En þá fer fram keppni Elite karla þar sem Ingvar Ómarsson tekur þátt. Hefst hún klukkan 10.30 að íslenskum tíma.

Hægt er að fylgjast með keppninni í beinni útsendingu m.a. á GCN+ og Eurosport.