Fyrsta landslið Íslands í Enduro fjallahjólreiðum tók þátt í Trophy of Nations keppninni á vegum Enduro World Series í Finale Ligure á Ítalíu 2. október sl. Liðið var skipað þeim Jónasi Stefánssyni, Berki Smára Kristinssyni og Þóri Bjarna Traustasyni ásamt fararstjóranum Franz Friðrikssyni.

Mótið er heimsmeistaramót landsliða og fá sigurvegarar í Junior, Elite og Masters flokkum regnbogatreyjur UCI að launum, og eru krýndir heimsmeistar. 

Keppnisfyrirkomulagið var þannig að þrír einstaklingar mynda lið sem hjólar í þessu tilfelli 64 km. langa braut sem samanstóð af 5 sérleiðum sem voru 19 km. að lengd og lækkun upp á 2.440 metra. 

Keppnisdagurinn hófst kl. 9 að morgni og lauk ekki fyrr en kl. 17, var því um 8 klst. keppnisdag að ræða þar sem fyrir fram ákveðinn rástími var á hverri sérleið. Ljóst var því að ekkert mátti út af bregða til að liðsmenn næðu í start á hverri sérleið. Á milli sérleiða þurftu svo keppendur að hjóla sjálfir og reyndist ferðatími milli sérleiða verulega knappur og fóru okkar keppendur af stað í sérleið 3, 4 og 5 innan við mínútu eftir að hafa komist í rásmark. 

Að endingu tókst liðinu öllu að klára og komast í mark og urðu þar með eitt af 18 liðum í elite karlaflokki til að ná að klára keppnina. Enn 6 lið duttu úr keppni vegna meiðsla eða tæknilegra örðugleika og brota á keppnisreglum. 

Reynsla ferðarinnar mun nýtast til að byggja upp og þróa Enduro greinina hér á landi og er ljóst að Ísland á ótvírætt erindi á þetta mót, sem og heimsbikarmótaröðina í Enduro World Series.