María Ögn Guðmundsdóttir og Ingvar Ómarsson eru tvöfaldir Íslandsmeistarar í fjallahjólreiðum. 

Í júlí fóru fram Íslandsmeistaramót í maraþonfjallahjólreiðum og fjallahjólreiðum. Fyrra mótið fór fram 14. júlí og var hluti af Hlaupahátíð á Vestfjörðum sem haldin var dagana 12.–15. júlí. Hjóluð var 55 km leið, svokölluð Vesturgata, en rásmark og endamark voru á Þingeyri.

Íslandsmeistari kvenna í maraþonfjallahjólreiðum 2018 er María Ögn Guðmundsdóttir, HFR, en hún kom í mark á tímanum 02:54:16. Í öðru sæti var Karen Axelsdóttir og í þriðja sæti var Kolbrún Dröfn Ragnarsdóttir, HFR. Ingvar Ómarsson, Breiðabliki, sigraði karlaflokkinn á tímanum 02:15:51.  Í öðru sæti var Hafsteinn Ægir Geirsson, HFR, og í því þriðja var Gústaf Darrason, Tindi.

Íslandsmeistaramót í fjallahjólreiðum var haldið 21. júlí á Ólafsfirði. Það voru Skíðafélag Ólafsfjarðar og HFA sem stóðu að keppninni sem fór fram á lokaðri braut á skíðasvæði Skíðafélags Ólafsfjarðar, Tindaöxl. Meðfram Íslandsmeistaramótinu fór fram almenningsmót en einnig kepptu yngri flokkar til Íslandsmeistaratitils.

Ingvar Ómarsson, Breiðabliki, fór með sigur af hólmi í meistaraflokki karla. Karlar hjóluðu fimm hringi og kom Ingvar í mark á tímanum 01:14:05. Hafsteinn Ægir Geirsson, HFR, var í öðru sæti og í því þriðja var Bjarki Bjarnason, HFR.

Í meistaraflokki kvenna sigraði María Ögn Guðmundsdóttir, HFR, á tímanum 01:03:26. Í öðru sæti var Freydís Heba Konráðsdóttir, HFA, og í þriðja sæti var Agnes Linnet, Bjarti. Konur hjóluðu þrjá hringi.

Gústaf Darrason, Tindi, var fyrstur í flokki U-23 karla og Kristinn Jónsson, HFR, sigraði junior-flokk karla. Matthías Schou Matthíasson, HFR, sigraði U-17 flokk drengja og Inga Birna Benediktsdóttir, HFR, sigraði U-17 flokk stúlkna. Davíð Jónsson, HFR, og Freyja Dís Benediktsdóttir, HFR, eru sigurvegarar í flokki U15. Magnús Smári Smárason, HFA og Elsa Guðrún Jónsdóttir báru sigur úr býtum í almenningsflokki.

HRÍ óskar öllum sigurvegurum til hamingju. Heildarúrslit má sjá á timataka.net.