Í gær var undirritaður samstarfssamningur milli Hjólreiðasambands Íslands, Ingvars Ómarssonar og Breiðabliks.

Markmið samningsins er að styðja og efla íþróttalegt umhverfi Ingvars. Styrkir á grundvelli samnings þessa eiga uppruna hjá ÍSÍ og eru veittir til sérsambands sem styrkir áfram einstakling, fyrst og fremst vegna kostnaðar æfinga, undirbúnings og þátttöku í keppnum á alþjóðlegum vettvangi.

Þessa stundina situr Ingvar í 54. sæti á heimslista í Maraþonfjallahjólreiðum (XCM), en til að halda þeirri stöðu þarf hann að taka þátt í sem flestum mótum sem í boði eru í greininni. Ingvar vill leggja sig fram um að koma sér enn hærra á þeim lista. Til þess að hann eigi kost á að ná þeim markmiðum sínum þarf hann á öflugum bakhjörlum að halda. Þess vegna gerir Hjólreiðasamband Íslands þennan samstarfssamning við Ingvar.

Ingvar hefur verið í atvinnumennsku síðan árið 2015 og hefur m.a. orðið Íslandsmeistari 27 sinnum og verið kosinn hjólreiðamaður ársins núna 8 ár í röð.

Hér ber að líta keppnisáætlun Ingvars í Evrópu á árinu 2022:

Andalucia Bike Race - UCI Marathon World Series - 21-26.febrúar - Spánn
Jura Bike Marathon - UCI C1 - 15.maí - Sviss
Belgian Mountainbike Challenge - UCI S1 - 19-22.maí - Belgía
Evrópumeistaramót í maraþon XC - UCI CC - 19.júní - Tékkland
Rothaus Bike Giro - UCI S1 - 4-7.ágúst - Þýskaland
Evrópumeistaramót í tímaþraut - UCI CC - 14.ágúst - Þýskaland
Evrópumeistaramót í götuhjólreiðum - UCI CC - 17.ágúst - Þýskaland
Mtb Liga Holte - UCI C2 - 11.september - Danmörk
Heimsmeistaramót í maraþon XC - UCI CM - 17.september - Danmörk
Sea Otter Europe - UCI C1 - 24.september - Spánn
Roc D'Azur - UCI Marathon World Series - 7.október - Frakkland

Áður en Ingvar fer utan til Sviss og Belgíu í næstu viku tekur hann þátt í Tímatöku móti Breiðabliks sem fer fram í kvöld og einnig Reykjalundarmóti Aftureldingar næsta laugardag.

Mynd: Ingvar ásamt Hákoni Hrafni Sigurðssyni fyrir hönd Breiðabliks, Mikael Schou afreksstjóra HRÍ og Bjarna Má Svavarssyni formanni HRÍ við undirritun samningsins.