Þá er komið að síðustu keppninni í cyclocrossmótaröð Tinds! Spennan er búin að vera mikil í vetur, og fólk hefur haft gaman af því að hittast og keppa í snjó, klaka og kulda, eins og sönnum hjólreiðamönnum sæmir.

Staðan í stigakeppninni er ansi spennandi, en hana má sjá hér.

Að þessu sinni verður horfið aftur til Nauthólsvíkur, en nú í nýrri og náttúruvænari braut en áður. Nýja brautin er lausari við gras en sú gamla, og færir keppendur nær sandi, hólum og klettum, en er á sama tíma hraðari og flæðir einnig mjög vel. Við viljum vekja athygli á því að keppnin hefst klukkan 10:00 í þetta skiptið, en ekki kl 11:00 eins og vaninn hefur verið. Þetta er gert til að vera á undan umferð almennings um ströndina, en hún opnar almenningi kl 11:00.

Að keppni lokinni verður opið í heitapottinn á svæðinu, aðgangur er 500 krónur. Einnig ætlum við að stilla upp grillinu og elda uppáhaldsmat hins almenna afrekshjólara, pulsur! Verðlaunaafhending, bæði í aldursflokkum og yfir heildina verður einnig á ströndinni eftir keppnina.

Kort af nýju brautinni má sjá á síðu keppninnar á www.hjolamot.is, keppnisgjald er aðeins 500 krónur, og öllum sem eiga cyclocrosshjól er skylt að láta sjá sig, og hjóla í þessar litlu 45 mínútur ;)