Met þátttaka í Þingvallakeppni Hjólamanna.  Rafrænt tímatökukerfi stóðst prófið þegar um 20 manna "peloton" æddi í átt að endamarkinu.

Skötuhjúin María Ögn Guðmundsdóttir og Hafsteinn Ægir Geirsson tóku fyrstu sætin í Þingvallakeppninni í morgun. María sigraði kvennaflokk með miklum yfirburðum, stakk keppinauta sína af þegar 25 km voru í mark og kom ein í mark á glæsilegum tíma, hún hjólaði kílómetrana 51, sem kvennaflokkur fór, á tímanum 1:28:08. Hafsteinn vann á lokaspretti, sjónarmun á undan Ingvari Ómarssyni á tímanum 1:49:22 en Davíð Þór Sigurðsson varð þriðji, sjónarmun á eftir Ingvari. Karlaflokkur hjólaði fjóra hringi í þjóðgarðinum, samtals 68 kílómetra sem þýðir að meðalhraði Hafsteins var 37,3 km/klst. Valgarður Sæmundsson stakk af í karlaflokki á fyrsta hring og hjólaði einsamall í rúmlega einn hring en það reyndist honum ekki auðvelt að halda sínu á móti svo stórum hóp og hér var mættur til leiks.

Met þátttaka var í keppninni en 75 keppendur voru skráðir til leiks sem er tæplega helmings aukning frá fyrra ári. Umbúnaður um keppnina var nokkuð meiri en áður, dómarar fylgdu fyrstu keppendum í meistaraflokkunum og þess má geta að Ríkissjónvarpið mætti á staðinn með myndatökulið. Lögreglan kom og gætti öryggis keppanda og var innakstur bannaður í hluta brautarinnar. Öll tímataka var með rafrænum hætti sem tryggði að hún gekk snuðrulaust fyrir sig.

Önnur úrslit urðu þau að Ólöf Pétursdóttir sigraði í A-flokki kvenna en hún hjólaði 34 kílómetra á tímanum 1:07:38. Garðar Erlingsson sigraði í A-fokki karla, hann hjólaði 51 kílómetra á tímanum 1:36:03.

Nánari úrslit má finna hér á hjolamot.is