Í dag komu saman um 30 ungir hjólarar til að taka þátt í hinum árlegu Hæfileikabúðum afreksdeildar Hjólreiðasambands Íslands. Búðirnar eru hugsaðar fyrir fremsta hjólreiðafólk landsins í flokkum U15, U17, U19 og U23.

Markmið þeirra er að efla samstöðu ungra og hæfileikaríkra iðkenda úr öllum greinum hjólreiða og þar með hvetja þau áfram til virkrar þátttöku í keppnum hér heima sem og að bæta árangur og getu. Einnig að gefa þeim aukna hvatningu, gera þau sterkari og betur undirbúin til að takast á við þau verkefni sem í boði eru á vegum landsliðs Hjólreiðasambands Íslands.

Dagurinn hófst klukkan 14 þar sem fyrsta æfing dagsins var á dagskrá. Fjallahjólahópurinn hittust í Vífilstaðahlíð á meðan Götuhjólahópurinn hjólaði frá Nauthólsvík og endaði inni í Reykjadal í Mosfellsdal.
Fjallahjólahópurinn verður næstu daga undir handleiðslu þjálfaranna Bjarka Bjarnasonar og Steina Sævarssonar. Götuhjólahópurinn verður undir handleiðslu Ásu Guðnýar Ásgeirsdóttur, Ingvars Ómarssonar og afreksstjóra HRÍ Mikaels Schou.