3. umferð EWS fer fram um helgina.

Nú um helgina, 12.–13. maí, keppa þrír Íslendingar í 3. umferð Enduro World Series (EWS Montagnes du Caroux) sem fram fer í Olargues, Frakklandi. Þetta eru þeir Jónas Stefánsson, HFA, Davíð Þór Sigurðsson, HFR og Rúnar Theodórsson, HFR. Alls eru átta sérleiðir í keppninni og er talað um að þetta verði með þeim erfiðari EWS keppnum sem haldin hefur verið.

Dagur 1 inniheldur 45km hjólun, þar af 10,4km á 4 sérleiðum, um 1000m klifur og 1470m niður. Sérleið 4 þennan daginn er innanbæjar í bænum Olargues þar sem keppnin er haldin.

Dagur 2 inniheldur 36km hjólun, þar af 12,6km á 4 sérleiðum, um 1580m klifur og 2200m niður.

Sérleiðirnar eru mjög krefjandi, brattar, grýttar og tæknilegar og enn lúrir rigning í spákortunum sem gæti birst seinnipart laugardags.

Meiri upplýsingar um keppnina og beina tímatöku er að finna á www.enduroworldseries.com.

HRÍ óskar þeim öllum góðs gengis!