Smáþjóðaleikarnir fara fram í Andorra dagana 26. til 31. maí. Hjólreiðar eru meðal keppnisgreina í ár, en þeir eru ekki fastagrein á leikunum. Seinast var keppt í hjólreiðum árið 2017.

Í ár sendum við samtals 13 þátttakendur og 5 þjálfara/fararstjóra. Fyrsta árið sem við sendum þátttakendur í hjólreiðakeppni leikanna var árið 1995.

Allir þeir keppendur sem nú fara eru að mæta á sína fyrstu leika nema Ingvar Ómarsson. Leikarnir í ár verða  hans 3. í röð, en hann var einnig meðal þátttakenda seinustu tvö skipti sem við höfum sent þátttakendur á leikana. Ingvar keppti í fjallahjólakeppnunum árin 2017 og 2013.

Auk hans eru aðeins tveir aðrir sem áður hafa tekið þátt í 3. leikum. En þeir Hafsteinn Ægir Geirsson og Árni Már Jónsson tóku þátt í götuhjólreiðakeppnunum árin 2005, 2011, 2013.

Einu verðlaunin sem við höfum náð í á leikunum komu árið 2017 þegar Erla Sigurlaug Sigurðardóttir vann til tvennra verðlauna fyrst og enn sem komið er ein Íslenskra hjólara. Erla Sigurlaug endaði í öðru sæti í götuhjólakeppninni og í 3. sæti í fjallahjólakeppninni það árið.

Þrír af fararstjórunum okkar hafa áður farið á leikana sem keppendur, en það eru þau :

Ása Guðný Ásgeirsdóttir (2017 - RR/TT)
Bjarki Bjarnason (2017 - XC)
Bjarni Már Svavarson (1995 - RR)

Einnig eru með í för þeir Hjalti G. Hjartarson fararstjóri og Conor Campbell, landsliðsþjálfari.

Keppni hefst á morgun og mun því íslenski hópurinn æfa í dag áður en haldið verður á setningarhátíðina sem fer fram á þjóðarleikvangi Andorra í knattspyrnu. Setningarhátíðin hefst kl. 19:30 að íslenskum tíma og verður hægt að fylgjast með henni í beinni útsendingu á Anoc.tv.

Einnig verður þar hægt að fylgjast með keppnum á leikunum í beinni útsendingu.

Úrslit og keppnisdagskrá: gsse-andorra2025.com
Upplýsingar um keppendur og fylgdarlið má finna hér: ISI.is