Það má með sanni segja að þetta sumar sé svolítið öðruvísi en önnur sumur.
En eins og öllum er kunnugt þá voru á hádegi í dag hertar samkomureglur og hefur það áhrif á mótaskrá HRÍ.

ÍSÍ óskaði eftir nánari útlistun frá sóttvarnarlækni varðandi íþróttastarfsemi fullorðinna og fékk til baka tilmæli um eftirfarandi:

1.     Að gert verði hlé á æfingum og keppni í íþróttum með snertingu til 13. ágúst næstkomandi eða þar til núgildandi auglýsing um takmarkanir á samkomum fellur úr gildi. 

2.     Að æfingar og keppni í íþróttum án snertingar haldi áfram eftir því sem hægt er, að virtum reglum um fjöldatakmarkanir og nálægðarmörk skv. auglýsingu heilbrigðisráðherra.

3.     Að sameiginlegur búnaður verði sótthreinsaður milli notkunar/notenda.

Þar sem ekki er hægt að tryggja nálægðarmörk í keppnum með hópræsingu þá verður að fresta þeim mótum sem á að halda á þessu tímabili og eru það 4. stigamót í götuhjólreiðum (samskipamótið) sem fara átti fram þann 8. ágúst og 6. stigamóti í Criterium sem fara átti fram þann 4. ágúst.
vinna er hafin við að finna aðrar dagsetningar.
Mót sem eru með einstaklingsræsingu (TT og DH) verða haldin, en mótshaldarar verða að tryggja að ekki séu fleiri en 100 manns í mótinu og einnig að tryggja fjarlægðarmörk og að ekki verði hópamyndun og að við afhendingu keppnisgagna verði auðvelt aðgengi að spritti.
Ekki verður unnt að hafa hefðbunda verlaunaafhendingu á meðan ástandið er svona.

þetta eru virkilega erfið skref sem verið er að taka en við skulum standa saman og kveða niður þessa veiru.