Fréttir

Í gær lauk íslenski landsliðshópurinn keppni í Norðurlandamótinu í ólýmpískum fjallahjólreiðum (XCO) sem haldin var á Skullerud (Ósló) í Noregi. Strákarnir voru undir styrkri leiðsögn Bjarka Bjarnasonar fararstjóra og þjálfara. Anton Sigurðarson keppti í aldurshópnum U17 (15–16 ára), þeir Tómas Kári Björgvinsson Rist, Davíð Jónsson og Breki Gunnarsson kepptu í Junior flokki en Kristinn Jónsson í Elite flokki. Á laugardag fór fram Norðurlandamótið í XCO í flokkunum Junior, Elite og Master. Keppnin í U17 flokki gilti ekki til Norðurlandamóts. Úrslit má sjá hér: https://live.eqtiming.com/61759#result Í gær, sunnudag, var svo keppt í styttri "short track" keppni (XCC) í öllum flokkum en þar gekk íslenska hópnum mun betur en deginum áður. Úrslit má sjá hér: https://live.eqtiming.com/61760#result Hitinn var mikill, brautin afar tæknileg og samkeppnin mun meiri en menn eru vanir. Keppendur okkar lögðu allt í þetta og stóðu sig allir vel. Þeir koma heim reynslunni ríkari er þeir stefna að næstu keppnum á fjallahjólinu.

Nú rétt í þessu var Ingvar Ómarson að ljúka keppni í götuhjólreiðakeppni Evrópumótsins í München, Þýskalandi. Hjólaðir voru 209,4 km. og var hún í beinni útsendingu á Rúv2. Ingvar stóð sig með mikilli prýði og náði að klára keppnina og endaði í 111. sæti, 3,31 mín á eftir sigurvegara dagsins og nýkrýndum Evrópumeistara Fabio Jakobsen frá Hollandi. Með þessu varð Ingvar fyrstur Íslendinga að klára elite keppni á meistaramóti í götuhjólreiðum. Hjólaðir voru rúmir 140 km. áður en komið var inni í München borgina sjálfa. Þar voru svo farnir fimm 13 km. langir hringir um þröngar götur og torg borgarinnar. Í samtali kvaðst Ingvar vera mjög sáttur með daginn þar sem hann hafi náð sínum markmiðum sem voru einfaldlega að klára keppnina, það hafi þó verið erfitt. Tilfynningin að svo hjóla yfir endalínuna í lok fimmta hrings hafi verið góð. Ingvar sprengdi dekk á öðrum hring og þurfti að hinkra eftir aðstoð að fá vara gjörð. Við það tapaði Ingvar rúmri hálfri mínútu á hópinn, það hafi svo tekið hann um hálfan hring að vinna sig upp og ná hópnum aftur sem hafi tekið mikla orku frá honum, en þó tekist þegar um þrír hringir voru eftir. Brautin sem farin var í dag hafi hentað vel til að klára keppnina þar sem hún væri meira í líkindum við flestar brautir sem farnar eru í götuhjólakeppnum á þann hátt að hópurinn héldist meira saman allan daginn í stað þess að liðin væru að reyna að sprengja upp keppnina snemma, eins og hafi verið t.d. tilfellið í fyrra á Evrópumótinnu á Ítalíu. Því hafi brautin hentað vel fyrir Ingvar sem var auðvitað án liðsfélaga í brautinni í dag.

Á næstu dögum mun Silja Jóhannesdóttir bætast við kvennalandslið Hjólreiðasambands Íslands og mun hún keppa ásamt Hafdísi og Silju R. fyrir Íslands hönd í götuhjólakeppni EM í München þann 21. ágúst n.k. RÚV 2 mun sýna beint frá öllum keppnum Evrópumótsins, en dagskráin er eins og hér segir: Hópstart Elite KK - 209,4 km Sunnudag, 14. ágúst kl. 08:05 Tímataka Elite KVK - 24 km Miðvikudag, 17. ágúst kl. 11:50 Tímataka Elite KK - 24 km Miðvikudag, 17. ágúst kl. 15:20 Hópstart Elite KVK - 129,8 k Sunnudag, 21. ágúst kl. 09:20

Þann 10. ágúst n.k. heldur hópur ungra og efnilegra fjallahjólara áleiðis á Norðurlandamótið í XCO í Ósló, dagana 13.–14. ágúst. Nánari upplýsingar um keppnina má finna á heimasíðu hennar hér.

UCI hefur formlega boðið afreksfólk HRÍ á aldrinum 16–22 ára í sérstakar æfingabúðir er einblína á færni og þjálfun á sviði cyclo-cross greinarinnar.

Í Öskjuhlíðinni í gærkvöldi fór fram Íslandsmótið í Ólympískum fjallahjólreiðum, XCO. Mótið var haldið af Hjólreiðafélagi Reykjavíkur. Sigurvegarar í Elíte flokkum og Íslandsmeistarar ársins 2022 voru þau Erla Sigurlaug Sigurðardóttir og Ingvar Ómarsson. Í öðru sæti í flokki kvenna var Elín Björg Björnsdóttir og í þriðja sæti Helga Lísa Kvaran. Í öðru sæti í flokki karla var Kristinn Jónsson og í þriðja sæti var Bjarki Bjarnasson.

Ólympíuhátíð Evrópuæskunnar mun fara fram í Banská Bystrica, Slóvakíu dagana 24.-30. júlí n.k. Þrír þátttakendur munu taka þátt fyrir hönd Hjólreiðasambands Íslands, en keppnisferðin, utanumhald og skipulag er í höndum Afreks- og Ólympíusviði ÍSÍ. Þau þrjú sem munu taka þátt eru þau; Brynjar Logi Friðriksson, Ísak Gunnlaugsson og Sigríður Dóra Guðmundsdóttir öll úr HFR. Íslensku þátttakendurnir munu bæði taka þátt í götuhjólreiða keppninni sem og tímatökunni (U17).

Í gær fór fram Íslandsmótið í Fjallabruni í Hlíðarfjalli Akureyri. Mótið var haldið af Hjólreiðafélagi Akureyrar. Sigurvegarar í Elíte flokkum voru þau Helga Lísa Kvaran og Bjarki Sigurðsson. Í öðru sæti í flokki karla var Jónas Stefánsson og í þriðja sæti varð svo Jökull Þór Kristjánsson. Úrslit dagsins voru þessi: A-flokkur Karlar 1. Bjarki Sigurðsson - HFA 2. Jónas Stefánsson - HFA 3. Jökull Þór Kristjánsson - BFH A-flokkur Konur 1.  Helga Lísa Kvaran - HFR JUNIOR KK 1. Elís Hugi Dagsson - BFH 2. Tómas Kári Björgvinsson Rist - BFH 3. Benedikt Björgvinsson - HFR U17 KK 1. Anton Sigurðarson - BFH 2. Skírnir Daði Arnarsson - HFA 3. Björn Andri Sigfússon - HFA U17 KVK 1. Júlíetta Iðunn Tómasdóttir - HFA 2. Elísa Magnúsdóttir U15 KK 1. Hlynur Snær Elmarsson - HFA 2. Tómas Rafn Harðarson - HFA 3. Einar Valur Bjarnason - HFR U15 KVK 1. Linda Mjöll Guðmundsdóttir - HFR U13 KK 1. Anton Ingi Davíðsson - HFA 2. Birkir Gauti Bergmann - Tindur 3. Friðþjófur Arnar Helgason - BFH U13 KVK 1. Sylvía Mörk Kristinsdóttir - HFA 2. Ásta Ninna Reynisdóttir - HFA 3. Harpa Kristín Guðnadóttir - HFA U11 KK 1. Elvar Magni Þorvaldsson - HFA 2. Eldar Ásþórsson - HFA Master 35+ flokkur KK 1. Sigurður Ólasson - BFH 2. Helgi Berg Friðþjófsson - BFH 3. Kristinn Magnússon - HFA Master 35+ flokkur KVK 1. Heiðrún Guðbjörnsdóttir - Tindur 2.Greta Huld Mellado - HFA 3.Þórdís Einarsdóttir - HFR

Evrópumótið í götuhjólreiðum fer fram í München, Þýskalandi 14.–21. ágúst 2022 n.k. Til þátttöku fyrir Íslands hönd hefur Hjólreiðasamband Íslands valið úr afrekshópi sínum þau: - Ingvar Ómarsson Breiðablik - Hafdísi Sigurðardóttir HFA - Silju Rúnarsdóttir HFA Öll munu þau taka þátt í tímatökukeppni sem og götuhjólakeppni Evrópumótsins.

Evrópumótinu í U23 flokki karla í götuhjólreiðum var að ljúka í Anadia, Portúgal. Eyþór Eiríksson (HFR) náði að halda vel í hópinn á fyrsta hring en datt aftur úr á öðrum hring. Samtals náði hann að hjóla þrjá hringi áður en hann þurfti að hætta keppni vegna tímamarka. Matthías Schou Matthíasson (Tindur) missti af hópnum upp klifrið á fyrsta hring og fékk að hjóla einn hring áður en hann var flaggaður úr keppninni.